بنتفرج على أفلام الخيال اللي قالت إنه في فيروس هيصيب البشر ويحولهم لزومبي متوحش. الحقيقة الأفلام دي بتتحقق ولكن بشكل مختلف شوية، بدل ما الفيروس يغير شكل الإنسان ويحوله في صورة شخص مخيف ومشوه من الخارج، فإنه بيحوله لزومبي مرعب ومشوه من الداخل، زومبي وحش وقاتل، يفتك بأقرب الناس له، حتى نفسه. الزومبي ده هو الاضطراب النفسي، اللي مش من السهل إن الناس العادية تلاحظه، ولا حتى الشخص المصاب. وللأسف الاضطرابات النفسية بتزيد عالميا بصورة مخيفة، فبحسب منظمة الصحة العالمية، فإن أكثر من مليار شخص يعاني من اضطرابات نفسية وخاصة الشباب، ومش كدة وبس، الاضطرابات دي أكثر من 30% منها بيظهر في سن مبكرة من حياة الفرد، يعني بين المراهقين والشباب
الناس اللي بتتصاب بزومبي الاضطراب النفسي ده، بيكون منهم الأب والأم، والطالب، والموظف، والمسؤول، وحتى ربما رئيس حكومة أو رئيس دولة، يعني في كل الأحوال الشخص المصاب بيكون مسؤول عن اتخاذ القرار سواء على المستوى الاجتماعي أو الاقتصادي أو السياسي. وده في حد ذاته خطر يهدد العالم كله، ولازم ننتبه له كويس وإلا ستفنى الكرة الأرضية بمن عليها.
والإنسان مننا بيقع تحت ضغوط الحياة، ضغوط العمل، ضغوط الأهل، و ممكن يتحول إلى وحش قاتل ولكن يتخفى في صورة حمل وديع. وده بسبب الاضطرابات النفسية؛ لأن كثرة الضغوط مع استعداد الفرد للإصابة بالاضطراب النفسي، وظروف البيئة تخلي الشخص ممكن يكون قاتل، وده بنشوفه في حوادث القتل اللي يبقوم بيها ناس إحنا شايفينهم إنهم على خلق عالي. وبنبقى مستغربين ونقول "إزاي ده ممكن يقتل؟ ده كان شخص محترم؟" السبب في ده هو إن الزومبي الخفي اتشكل جواه بسبب الاضطراب النفسي إللي أصابه من غير ما يحس إنه مصاب، ولا حتى اللي حواليه حاسين بإصابته. وفي الآخر بنتفاجئ بوحش يفتك بأقرب الناس ليه. والدلائل كتير، زي اللي قتل اللي بيحبها، واللي قتلت ولادها فلذات أكبادها، وغيرها من الحوادث البشعة.
نصيحتي، نحافظ على صحتنا
النفسية، نستعين بمختص نفسي أو اجتماعي ليساعدنا على تخطي أزماتنا، نحضر كورسات
تعلمنا إزاي نتخلص من الضغوط، تعلمنا إزاي نعرف إن كنا مضغوطين وعندنا مشكلة نفسية
والا لأ، تعلمنا إزاي نحمي نفسنا من الاضطراب النفسي، تعلمنا إزاي نحافظ على
ولادنا من تدهور صحتهم النفسية. الأمر مهم جدا ومينفعش نستهين بيه، لأن فعلا
الاضطرابات النفسية هي زومبي العصر اللي بيستشري فينا من غير ما نحس، ويحولنا
لوحوش تنهش في كل اللي يقرب منها وتدمره وتدمر نفسها كمان.
ليست هناك تعليقات:
إرسال تعليق